|
12-08-2006 - " VEUJOAR "
t ' Is April
Weg mit kòl., mist en snij.
Zunne kriegt weer kracht.
Vogels zing'n heur hoogste laid.
t ' Wordt waarmer, t ' is nait meer zo kil.
n ' Boer plougt zien laand.
n ' Raaiger stait aan kaant.
Van een sloot vol kikkerdril.
t ' Is veujoar.
Dat is wat ik wil.
Groetjes,
Plaze.
Gepost door: plaze op 12-08-2006 om 17:21
Klik hier om de 1 reactie(s) te bekijken.
|
|
11-08-2006 - " OP TOENE "
nr. 1 " Boontje komt om zien loontje "
Het is een laange, kille en veural natte winter.
En't waait as in november.
Woarschienlek is dat de reed'n woarom ik Frits al een haile tied nait zain heb op toene.
Aal dei natte en koale boudel is ja niks veur hom. Frits is den nait veur kachel weg te brand´n.
Frits en ik hebben soamen een gruintetoene op volkstoenkomplex in onze ploatse. Omdat we baide een klain gezin hebben is ein toene veur ons baide groot genog.
Vanmiddag mot ik hom moar es even opzuiken in leutje hoeske bie 't achterdaip. Gewoon even kiek'n hou ter bie stait.....
Bie zien hoes aankomen zet ik fietse tegen de hoge hege aan en loop noar d'achterdeure. Nee, is der nait, boudel zit op slöt.
"Verrek, t' is ook ja woendag, gait Frits altied met zien vrouw noar de maarkt ".
As ik veur alle zekerhaid toch nog moar even deur 't roam noar binnen kiek zai ik Frits in zien rookstoale zitten met een douk om zien aarm.
"Ik kom der aan", zegt Frits as hij zuch omhoog wurmt oet zien laaie stoule.
Veurzichtig gait d'achterdeure open .
As ik koamer in kom is't net of ik een waarme deken om mie tou krieg, zo waarm, zeg moar hait is't in't leutje koamertje.
"Man wat is der toch met tie gebeurt Frits, wat hest nou toch weer oetvreten"?, vroag ik terwail as ik mien jaze oettrek.
Frits zakt weer in zien rookstaole en vertelt mie dat hij oetgleden is op't kerkhof. Meneer was bezig wilgetakken oaf te snieden, is doar bie op een graf klommen en is toun oetgleden en het zien polze broken.
Van wilgetakken mokt Frits altied bonestokken.
"Tsonge jonge Frits, bist tachtig joar, denk doar toch es om".
T' is tegen dovemansoren zegt. Frits is altied op struun. Hij ken alles gebruuk'n.
As 't moar niks kost.
Ja, in dit geval ken je toch met recht zegg'n, boontje komt om zien loontje.
Woar gebeurt.
Volgende keer weer een verhoal wat zuch oafspeult op toene.
Groetjes,
Plaze.
Gepost door: op 11-08-2006 om 15:35
|
|
|